Православные акафисты
Кондак 1
Избранному Богом на служение Ему в чин ангельстем, добре Господеви послужившему и преподобне пожившему, ныне же на небесех с лики ангельскими и всеми святыми водворяющуся, тебе, отче наш Иоанне, яко великому о нас пред Богом ходатаю, смиренное сие похваление усердно приносяще, с любовию зовем:
Радуйся, Иоанне преподобне, пустынножителей светлое украшение.
Икос 1
Ангел земный и человек небесный был еси, богоносне отче наш Иоанне, егда гласа Евангелия добре послушав, и взем крест свой, вослед Христа усердно потекл еси, и в пустыню Рыльскую вселився, в ней равноангельное житие показал еси. Темже подвиги твоя достойно почитающе, ублажаем тя похвалами сими:
Радуйся, отечества твоего изрядное украшение.
Радуйся, благочестиваго корене отрасле благословенная.
Радуйся, Христа единаго всем сердцем возлюбивый и Того единаго взыскавый.
Радуйся, вся красная мира сего любве ради Христовы презрвый.
Радуйся, вся имения твоя, от родителей твоих тебе оставльшаяся, нищим и немощным разделивый.
Радуйся, в воздаяние того небесная блага получивый.
Радуйся, Иоанне преподобне, пустынножителей светлое украшение.
Кондак 2
Видев Сердцевдец Господь доброту души твоея и чистоту помышлений, подаде ти крепость и силу противустати искушением, от мира, плоти и диавола находящим, да отбегнув сует мира и земных всех попечений, невозбранным помыслом и чистым сердцем Богу единому поработаеши, поя Ему: Аллилуия.
Икос 2
Разумев жития сего прелесть временну быти и скоропогибающу, потщался еси единаго нетленнаго и николиже оскудевающаго сокровища во Христе взыскати, и яко елень на источники водныя, сице устремился еси к воды живыя Источнику, от Негоже напився обильно, доволен явился еси и другия удовлити, зовущия тебе таковая:
Радуйся, Божий избранниче, искушеньми мира сего никакоже прельстивыйся.
Радуйся, мудрый странниче, небеснаго отечества взыскавый.
Радуйся, вольную нищету Христа ради паче богатства возлюбивый.
Радуйся, чистоту души и тела твоего Христу непорочно соблюдый.
Радуйся, сердце твое любовию Того сладце уязвивый.
Радуйся, умом твоим непрестанно Тому предстоявый.
Радуйся, Иоанне преподобне, пустынножителей светлое украшение.
Кондак 3
Силою благодати Божия укрепляемь, удалился еси, бегая мира суетнаго, и водворился еси в пустыни, чая Бога, спасающаго тя от малодушия и от бури, и тамо гору высоку обрет, келлийцу малу из тростника создав, в ней заключился еси, поучаяся мысленному на гору добродтелей восхождению, непрестанно поя Богу: Аллилуия.
Икос 3
Имя едино попечение, како угодити Господеви, добрым подвигом подвизался еси, яко добр воин Иисус Христов, да возможеши козни вражия одолети и победитель тех явитися. Сего ради ублажаем тя:
Радуйся, ради Господа твоего, не имевшаго где главу подклонити, обычнаго человеком жилища не стяжавый.
Радуйся, покров — небо, одр же — землю точию имевый.
Радуйся, первому новыя благодати пустынножителю, Крестителю Иоанну, подражавый.
Радуйся, подобен тому дивиим былием земным точию питавый.
Радуйся, якоже оный ризу кожану одяние имевый.
Радуйся, смирением высокая, нищетою же богатая дарования стяжавый.
Радуйся, Иоанне преподобне, пустынножителей светлое украшение.
Кондак 4
Бурею неистовых страстей одержимии, разбойницы нападоша на тя, преподобне, и келлийцу твою, в нейже подвизался еси, разориша. Ты же, незлобив сый, молился еси не поставити им греха сего, сам же, ино место в пустыни, суровйшее еще обрет, на вящшия подвиги устремился еси, Богу же, вся во благо строящему, благодарение возсылая, пел еси: Аллилуия.
Икос 4
Видя, преподобне, возлюбленнаго ти сродника Луку отрока к тебе грядуща, зело удивился еси, и тек в сретение тому, облобызал еси его любовию, Бога же вельми благодарил еси, яко такова юна отрока на пустынное безмолвное житие приведе, егоже прием, соучастника подвигов твоих соделал еси. Темже слышиши сия:
Радуйся, монашескаго жития правило известнйшее.
Радуйся, пустыннаго безмолвия образе любезнейший.
Радуйся, лествице духовнаго восхождения.
Радуйся, мосте, жизни сея блато немокренно преходити научаяй.
Радуйся, младых на подвиг поощряяй.
Радуйся и старцы подвижники в подвизех укрепляяй.
Радуйся, Иоанне преподобне, пустынножителей светлое украшение.
Кондак 5
Боготечная звезда явился еси сроднику твоему Луце, наставляя его на стезю добродетели. Якоже бо звезда оная, волхвом явльшаяся, вертеп рождшагося на земли Господа показа, тако и ты Господа, в сердцах ищущих Его почивати изволяющаго, тому показал еси, научая непрестанно воспевати Ему: Аллилуия.
Икос 5
Слышав отец отрока, яко сын его купно с тобою в пустыни в богоугождении пребывает, ослеплен сый духом злобы, не разуме прославити о сем Бога, но ярости исполнився, досаждаше тебе, преподобне, словесы укоризненными. Ты же, кроток сый и смирен сердцем, ничтоже противувещал еси, но в тайне сердца твоего о обращении яростию палимаго молился еси. Сего ради зовем ти:
Радуйся, кротости и незлобия рачителю.
Радуйся, тихости и смирения учителю.
Радуйся, от брата твоего по плоти оскорбления и поругания приемый.
Радуйся, по словеси евангельскому не противитися злу, ничтоже вопреки отвещавый.
Радуйся, возлюбленнаго ти южика духовно воспитавый.
Радуйся, лишением того сожительства зло огорченный.
Радуйся, Иоанне преподобне, пустынножителей светлое украшение.
Кондак 6
Проповедует пустыня Рыльская подвиги и чудеса твоя, отче преподобне, ты бо, крест Христов на рамена твоя взем, усердно и неуклонно Тому последовал еси, с Павлом апостолом дерзновенно глаголя: вся могу о укрпляющем мя Христе, Емуже предстою, умом и сердцем зовый: Аллилуия.
Икос 6
Возсия свет познания человеколюбнаго смотрения Божия о спасении коегождо человека в сердце брата твоего, преподобне, егда узре он сына своего, нуждею от тебе уведеннаго, смертоносным змия уязвлением мертва лежаща; познав убо грех свой, раскаяся, и возвратився к тебе, повда о приключшемся, зло плачася и прощения прося. Ты же, слышав и смотрению Божию дивяся, повелл еси отрока при пещер твоей погребсти, да над гробом его молитися возможеши. Приими убо от нас сицевая:
Радуйся, яко твоею молитвою ученику твоему, нуждею в мир влекомому, никакоже тамо возвратитися попустися.
Радуйся, яко смерть того не смерть, но паче преселение в жизнь вечную явися.
Радуйся, яко сею смертию сына отец, ослеплен сый духовныма очима, просветися.
Радуйся, яко много может молитва твоя, якоже молитва праведника.
Радуйся, незлобием твоим ярость брата на кротость преложивый.
Радуйся, того к покаянию приведый.
Радуйся, Иоанне преподобне, пустынножителей светлое украшение.
Кондак 7
Хотяй душу твою спасти, о плоти твоей всяко небрегл еси: на земли бо леганием, пощением и бднием себе изнуряя, плоть твою духови совершенно покорил еси, и единаго Хлба животнаго — Иисуса сладкаго взыскал еси, Емуже во всенощных стояниих яко ангел безплотен немолчно пел еси: Аллилуия.
Икос 7
Дивный, воистинну, образ подвижничества показал еси, отче: дупло бо древесное обрет, в нем вмсто келлии вселился еси, всяку тесноту претерпевая, по апостольскому словеси: лишен, скорбящь, озлоблен, аще и весь мир не бе достоин тебе. Приими убо, отче, аще и скудное, но с любовию тебе приносимое хваление сие наше:
Радуйся, терпения столпе неподвижный.
Радуйся, мужества духовнаго адаманте твердый.
Радуйся, и в бреннем телеси твоем, якоже и в души твоей, Бога прославивый.
Радуйся, еще жив сый Христу сраспныйся и Тому умерый.
Радуйся, образом подвижничества твоего ангелы удививый.
Радуйся, тем полки демонския устрашивый.
Радуйся, Иоанне преподобне, пустынножителей светлое украшение.
Кондак 8
Странно бе пастырем в необитаемй пустыни узрети человка в кожану ризу одеяна, необувена и без покрова главнаго, под лучами солнца палящаго на горе стояща. Текше убо в селение, поведаша людем, призывающе их, да шедше видят сего ангела во плоти и прославят Бога, дивнаго во святых Своих, поюще Ему: Аллилуия.
Икос 8
Вси жителие селения того, слышавше от пастырей о твоем в пределх их пребывании, возрадовашася и Бога вельми благодариша, таковую благодать им тобою даровавшаго. К тебе же, отче, приити потщашася, благословения и молитв твоих просяще, и тако проглашающе ти:
Радуйся, страны нашея светильниче пресветлый.
Радуйся, молитвенниче и предстателю о нас пред Богом теплейший.
Радуйся, пастырю и отче наш предобрый.
Радуйся, наставниче и учителю наш премудрый.
Радуйся, недугов наших телесных врачу безмездный.
Радуйся, и душевных наших язв целителю благодатный.
Радуйся, Иоанне преподобне, пустынножителей светлое украшение.
Кондак 9
Всякое естество ангельское радуется о едином грешнице кающемся и на добродетельное житие обращающемся. Кольми паче возрадовашася вси ангели Божии, видяще твое не точию добродетельное, но и воистинну равноангельное житие, емуже ты и приходящия к тебе ученики твоя наставлял еси и собор иночествующих ко Христу привел еси, вопиющих Ему: Аллилуия.
Икос 9
Ветийства риторская аще и много глаголют в похваление преподобных пустынножителей, но никакоже возмогут по достоянию воспети я: тии бо, яко звезды на тверди церковней десницею Творческою возжженныя, светло сияюще, мглу страстей земных прогоняют, нощь неведния просвещают и к небесному отечеству странником земным путь указуют. В нихже и ты, отче преподобне, сияеши и тако звати тебе научаеши:
Радуйся, звездо светозарная, Солнце мысленное нам указующая.
Радуйся, сосуде, в честь избранный, якоже апостол глаголет.
Радуйся, соль земли, душевное гноение отъемлющая.
Радуйся, жертво, саможженная Агнцу Божию, за мир закланному.
Радуйся, Владычицы мира служителю благоприятный.
Радуйся, всех святых Божиих друже любезнейший.
Радуйся, Иоанне преподобне, пустынножителей светлое украшение.
Кондак 10
Спасти восхотвшии благочестивии людие собрата своего от мучащаго его диавола, нуждею привлекоша его к тебе, отче, да ижденеши беса от создания Божия. Ты же, милосердствуя о страждущем, молитвою и святым креста знамением беса от того прогнав, здрава сотворил еси. Смирен же сый сердцем, недостойна и немощна себе быти сказуя, Богу единому благодарение возсылати научал еси и пети Ему: Аллилуия.
Икос 10
Стене подобную, скалу каменную неприступныя высоты обрет, не устрашился еси взыти на ню и вселитися: якоже бо елень от стрел ловца на горы убгает, тако и ты, от стрел похвал человеческих и славы суетныя бегая, на неприступную гору возшел еси, идеже подвиги твоя усугубил еси. Темже слышиши сия:
Радуйся, еленю мысленный, на высоту боговедения возшедый.
Радуйся, славы человческия избегнути тщавыйся, но от прославленнаго тобою Господа прославленный.
Радуйся, дар чудотворения от Того приемый.
Радуйся, бесы от человк прогоняяй.
Радуйся, от коварства и искушений тех нас соблюдаяй.
Радуйся, на стезю добродетели нас наставляяй.
Радуйся, Иоанне преподобне, пустынножителей светлое украшение.
Кондак 11
Пение благодарственное принесе тебе муж оный, тобою от беснования исцеленный, и припад лобызаше нозе твои, слезами я омывая. Такожде и вси людие, чудо сие, тобою сотворенное, видевшии, похвалами тя почтоша, преподобне, Бога же, таковую благодать тебе даровавшаго, вельми благодариша, поюще Ему: Аллилуия.
Икос 11
Свтозарное житие твое, яко свеща, десницею Вышняго возжженная, не возможе утаитися, по словеси евангельскому: никтоже, вжег свтильник, под спудом поставляет его, но на свещнице, да светит всем. Тако услышано бысть повсюду и о твоем равноангельнем житии, еже уведев, царь болгарский Петр вожделе видети тя и благословение от тебе прияти. Послав убо к тебе о себе моление, злато довольно в дар припасе. Ты же отвещал еси царю: злата твоего не требую, любовь же твою приемлю; обаче в житии сем временнем не имамы друг друга видети. Печален бысть царь о словеси сем, но исполнь сый любве к тебе, сия проглашаше тебе:
Радуйся, над всеми мира сего прелестьми преславно воцаривыйся.
Радуйся, злато яко блато вменивый.
Радуйся, нищету паче богатства возлюбивый.
Радуйся, тою небесное наследие купивый.
Радуйся, Царя царствующих воине изряднейший.
Радуйся, Господа господствующих служителю предобрый.
Радуйся, Иоанне преподобне, пустынножителей светлое украшение.
Кондак 12
Благодатию Божиею уведел еси время от жития сего отшествия, темже призвав ученики твоя, последнее благословение им подал еси, завещавая пустыннаго жития уставы неуклонно соблюдати, наипаче же в сердце и во устех сладчайшее имя Господа Иисуса непрестанно имети. И тако в руце Господа душу твою предал еси, не преставая пети Ему: Аллилуия.
Икос 12
Поюще подвиги и труды твоего равноангельнаго жития и множество чудес твоих, имиже прослави тя Христос, ублажаем тя яко таинника Божия благодати, любовию зовуще тебе:
Радуйся, благий рабе и верный, вшедый в радость Господа твоего.
Радуйся, небеснаго Иерусалима гражданине блаженный.
Радуйся, Царствия Божия наследниче.
Радуйся, сеявый слезами, ныне же радостию пожинаяй.
Радуйся, наслаждаяйся лицезрением сладчайшаго Иисуса, Егоже в сердце твоем сладце носил еси.
Радуйся, приемый от Него благодать и дерзновение молитися о всех, ходатайства твоего пред ним просящих.
Радуйся, Иоанне преподобне, пустынножителей светлое украшение.
Кондак 13
О, преподобне и богоносне отче нашъ Иоанне! Тебе, на небесех ныне молящемуся, мы грешнии, на земли еще странствующии и многими напастьми и бедами обуреваемии, усердно молимся: помози нам прочее время жития нашего безбдно прейти в покаянии и исправлении зол содянных нами, да помиловани бывше от Праведнаго Судии и Господа нашего, сподобимся с тобою и со всми святыми всегда воспевати Ему Аллилулия.
Сей Кондак читается трижды, затем Икос 1 и Кондак 1.
Молитва преподобному Иоанну Рыльскому
Земная звездо чудесная, облиставшая пределы града Средца, предивный постниче и угодниче Божий, отче Иоанне, преподобных радование, Церкве Болгарския украшение, крепкий адаманте веры Православныя и живый свещниче, всю землю Болгарскую светом правды Божия осиявый! Ты еси скорый помощник с верою и любовию к тебе притекающим и великий предстатель пред Господем о всех нас. Приими, блаженне, наша моления, и умоли Христа Бога нашего, да вси тобою наставляемии людие словенстии пребывают союзом братския любве связуеми, в мире и благочестии, и да избавит их Господь и вся грады и страны христианския от враг видимых и невидимых, и от нашествия иноплеменник, от недуга, и глада и всякия скорби, наипаче же от искушений врага темнаго. Предстоящим же зде и молящимся пред пречистым твоим образом испроси, преподобне, у Господа Бога нашего вся, яже ко спасению своему они просят, да вси с тобою прославляем всесвятое имя Отца и Сына и Святаго Духа, ныне и присно, и во веки веков. Аминь.
Тропарь преподобному Иоанну Рыльскому, глас 1
Покаяния основание, прописание умиления, образ утешения, духовнаго совершения равноангельное житие твое бысть, преподобне. В молитвах убо и в пощениих и в слезах пребывавый, отче Иоанне, моли Христа Бога о душах наших.
Кондак преподобному Иоанну Рыльскому, глас 2
в молитвах бодренно не усыпая и в пениих непрестанных ангелом подобяся, в гроб вшел еси, тленную жизнь оставив, и к небеси прешел еси на нетление, Иоанне отче, от смерти бо к животу вечному тя пресели Христос Бог, яко Своего угодника.
Величание
Ублажаем тя, преподобне отче Иоанне, и чтем святую память твою, наставниче монахов и собеседниче ангелов.
Молитвы Иоанну Рыльскому
К святому Иоанну молятся:
— о даровании здоровья и исцелении,
— о тяжело больных детях (аутизм),
— о детях, которые никак не могут начать говорить,
— о защите от порчи, сглаза и злых людей.
Молитва первая
О, преподобне и Богоносне отче наш Иоанне, зрителю неизреченныя славы в Небеснем Царствии и помощниче благодатный всем к тебе притекающим,
не остави места сего, на немже труды и подвиги о Христе подъял еси и землю слезами твоими оросил еси!
Да пребудет обитель твоя, в нейже благоволи Бог святым твоим мощем почивати, незыблема от ухищрений врагов видимых и невидимых.
Укрепи в доброделании чада твоя, ихже во обитель твою собрал еси, яко да познают звание свое и последуют стопам твоим.
Страну нашу в мире соблюди, православным людем во бранех на сопротивныя споборствуй.
Посети с высоты Небесныя всех, верно к тебе притекающих и просящих твоего крепкаго заступления:
в мори плавающих управи, житейскаго моря волнение утиши, церковныя раздоры укроти, мир всему миру у Господа испроси, болящих уврачуй спасительным посещением,
скорбных утеши благодатию, всем буди вся, якоже был еси в земнем житии твоем.
Сотвори о нас к Богу молитву, дана бо ти есть благодать молитися за ны, яко да сподобимся твоим ходатайством улучити вечное блаженство купно с тобою и всеми святыми во Христе Иисусе, Господе нашем, Емуже подобает всякая слава, честь и поклонение со Отцем и Святым Духом во веки веков.
Молитва вторая
Земная звездо чудесная, облиставшая пределы града Средца, предивный постниче и угодниче Божий, отче Иоанне,
преподобных радование, Церкве Болгарския украшение, крепкий адаманте веры Православныя и живый свещниче, всю землю Болгарскую светом правды Божия осиявый!
Ты еси скорый помощник с верою и любовию к тебе притекающим и великий предстатель пред Господем о всех нас.
Приими, преблаженне, наша моления и умоли Христа Бога нашего, да вси тобою наставляемии людие словенстии пребывают союзом братския любве связуеми, в мире и благочестии,
и да избавит их Господь и вся грады и страны христианския от враг видимых и невидимых и от нашествия иноплеменник, от недуга и глада, и всякия скорби, наипаче же от искушений врага темнаго.
Предстоящим же зде и молящимся пред пречистым твоим образом испроси, преподобне, у Господа Бога нашего вся,
иже ко спасению своему они просят, да вси с тобою прославляем Всесвятое имя Отца и Сына и Святаго Духа, ныне и присно и во веки веков.
Молитва третья
О, великий и предивный чудотворче, преподобне Иоанне, приими моление наше и не отвратися от нас, к твоему заступлению прибегающих:
никогдаже бо отвращался еси от приходивших к тебе с печальми своими во дни земнаго твоего жития;
вемы же, коликая знамения милосердия являл еси и по преставлении твоем людем православным!
Услыши и нас ныне, велиими скорбьми обдержимых, нашедшими на ны в лукавыя дни сия, егда диавол чрез пагубныя козни своя тщится попрати Церковь Святую, лишити же нас спасения вечнаго и благ временныя жизни!
Испроси нам у Господа Иисуса Христа прощения грехов, а наипаче греха непослушания Матери нашей Церкви!
Даруй нам сокрушение сердца, во еже со умилением неуклонно приступати ко святому Таинству Покаяния, яко да не во осуждение и погибель будет нам причащение Тела и Крове Христовых, но во здравие и спасение.
Отжени от нас дух братоненавидения, даруй нам дух любве и мира к братскому единению всех людей твоих!
Соеди всех нас любовию ко Христу и Его Церкве Православней, яко да соблюдающе спасительную волю Его, истинная чада Божия будем!
Буди нам путевождь во вся дни наша, яко да присно в благодати Духа Святаго суще в чистоте веру содержим и волю Господню до самыя смерти сотворим!
В час же кончины нашея явися нам представити души наша к престолу Божественнаго Судии и рещи Ему: «Се аз и дети моя»,
яко да твоим заступлением вечных мук избавльшеся, неизреченное блаженство Небеснаго Царствия Христова наследим купно с тобою и всеми святыми во веки веков.
Акафист преподобному Иоанну, Рыльскому чудотворцу и пустынножителю
Кондак 1
Избранный Богом и предивный житием, преподобне Иоанне, от юности Христа возлюбив, путем тесным к Нему шествовал еси; велиих же ради подвигов твоих и слез излияний дарованьми Духа Святаго обогатился еси. Темже яко велие ко Святей Троице дерзновение имуща ублажаем тя, просяще: от всяких нас бед свободи, зовущих: радуйся, преподобне Иоанне, Рыльский чудотворче, славо и радосте наша.
Икос 1
Ангел земный и человек небесный был еси, преподобне Иоанне. Како убо славу твою воспоем достойно, многими немощьми обдержимии? Но сам вложи песнь хвалебную во ycта нас, зовущих:
Радуйся, от родителей благочестивых рожденный; радуйся, ими в страсе Божии добре воспитанный.
Радуйся, из младенства от Церкве николиже отступивый; радуйся, тоя священными ученьми благодатный разум стяжавый.
Радуйся, заповедей Господних блюстителю верный; радуйся, пощений и бдений непрестанных делателю усердный.
Радуйся, по смерти родителей наследие свое убогим раздавый; радуйся, жития ради добраго гонение от человеков лукавых подъявый.
Радуйся, клеветы неправедныя претерпевый; радуйся, досаждения с кротостию понесый.
Радуйся, любовию Серафимскою вслед Христа последовавый; радуйся, ея ради путь узкий иночества избравый.
Радуйся, преподобне Иоанне, Рыльский чудотворче, славо и радосте наша.
Кондак 2
Видя мира сего суету, преподобне Иоанне, невозвратно того отвратитися потщался еси; ничтоже бо тебе от Христа можаше разлучити: ни узы сродства, ни юность твоя, ниже слава мира сего и красота. Сия убо вся ни во чтоже вменив, якоже елень на источники водныя, к Богу востекл еси, вопия Ему: Аллилуиа.
Икос 2
Разуму божественному покорился еси, блаженне, егда Господа в видении соннем узрел еси, от земли твоея изыти повелевающа ти и место спасения твоего показующа, и вся, яже в мире презрев, во обитель Руенскую вселился еси, идеже образ иноческий восприял еси. Сего ради вопием ти таковая:
Радуйся, житие иноческое возлюбивый; радуйся, противу греха воинствовати даже до смерти восхотевый.
Радуйся, купно с власы своими мирская вожделения отложивый; радуйся, с ненасытною жаждею к подвигом иноческим себе устремивый.
Радуйся, в предняя простираяся, задняя забвению предавый; радуйся, сладость жительства уединеннаго в себе обретый.
Радуйся, любве ради божественныя житие пустынное возлюбивый; радуйся, вины ради сея место пострига своего оставивый.
Радуйся, к горе, в видении тебе явленней, пришедый; радуйся, ничтоже имеяй, в колибе хврастней себе вселивый.
Радуйся, дивный пустынножителю; радуйся, Иоанна Крестителя подражателю.
Радуйся, преподобне Иоанне, Рыльский чудотворче, славо и радосте наша.
Кондак 3
Силою Духа Святаго осеняем в пустыни вселился еси, Иоанне, безмолвное житие провождати, с Богом невозбранно беседовати, Того ангельски непрестанно славословити, лучами света Божественнаго озарятися, за вся же люди и мир Спасителю Богу молитися, поя Ему присно: Аллилуиа.
Икос 3
Имея желание огнепальное боговидения Моисейскаго, преподобне, на гору возшел еси явления божественныя славы восприяти, ихже око не виде и ухо не слыша и яже на сердце человеку не взыдоша. И кто возможет изрещи вся подвиги твоя, в безмолвии сотворенныя? Но мы, дивящеся житию твоему, сице взываем ти:
Радуйся, бремя подвиг велиих на рамена своя возложивый; радуйся, житием твоим Ангелов удививый.
Радуйся, яко не хлебом, но былием травным себе питал еси; радуйся, и того бо зело мало по захождении солнца вкушал еси.
Радуйся, жажду водою в меру утолявый; радуйся, купно с пророком «скотен бых у Тебе» Богу вопиявый.
Радуйся, яко потоки слез от очей твоих источал еси; радуйся, молитвы бо твоя непрестанно Богу возсылал еси.
Радуйся, подвиги сими от страстей себе очистивый; радуйся, бесов в зверине образе тебе устрашити тщащихся посрамивый.
Радуйся, адаманте, козньми вражиими несокрушимый; радуйся, во всех искушениих и напастех всегда с Богом бывый.
Радуйся, преподобне Иоанне, Рыльский чудотворче, славо и радосте наша.
Кондак 4
Бурю напастей демонских укротити восхотев, в пещеру некую зело мрачную вселился еси, преподобне Иоанне, порабощая тело твое и лишаяся света солнечнаго, яко да не лишишися Божественнаго Света в Царствии Господа твоего и да поеши Ему тамо со всеми святыми: Аллилуиа.
Икос 4
Слышав о тебе, преподобне, сын брата твоего, Лука отрок, и родителей утаився, к тебе в пустыню приде и тобою наставляем восприя подвиги твоя. Мы же силою благодати твоея ужасаеми, вопием ти сице:
Радуйся, Светом Божественным южика своего озаривый; радуйся, дитя малое пустынна жителя соделавый.
Радуйся, от злобы древния сего ради напасть новую приемый; радуйся, клевету в похищении отрока претерпевый.
Радуйся, от брата своего поругания понесый; радуйся, детище от тебе отторженное благословением укрепивый.
Радуйся, молитвою слезною диаволи посрамивый; радуйся, отрока от змия ужаленнаго смертию с Господем соединивый.
Радуйся, цвете райский на камени гор Рыльских прозябый; радуйся, от Камене Божественнаго водою живою обильно напоенный.
Радуйся, таинниче Божий, в пустыни не утайвыйся; радуйся светильниче Христов во мраце пещернем просветивыйся.
Радуйся, преподобне Иоанне, Рыльский чудотворче, славо и радосте наша.
Кондак 5
Боготечней звезде подобни суть святии человецы: не точию бо сами ко Христу шествуют, но и прочиим людем спасения путь указуют. Сего ради вселукавый творит им напасти, якоже и тебе, Иоанне: нападе бо на тя во образе разбойник, иже избивше тя, отгнаша от пещеры первыя. Тогда ты в пустыню Рыльскую глубочае вшед, в дупло дуба великаго вселился еси, во еже большими труды Господа твоего прославляти и пети Ему: Аллилуиа.
Икос 5
Видя Господь толикое озлобление твое, преподобне, повеле земли да израстит слануток тебе в напитание; славна же тя яви пастырем, близ пустыни тоя обретшимся, да и мы купно с видевшими дивная дела твоя вопием тебе таковая:
Радуйся, от демонов велия страдания приемый; радуйся, воине Христов непобедимый.
Радуйся, не до конца от них озлобленный; радуйся, Христа покровом всемогущим покровенный.
Радуйся, пред лицем пастырей от Господа прославленный; радуйся, обретшим тя житие твое неволею известивый.
Радуйся, злаком чудесным тех напитавый; радуйся, отшедших их чудом дивным наставивый.
Радуйся, прочиим людем от них проповеданный; радуйся, от приходивших к тебе дарований Божиих не скрывый.
Радуйся, зело страждуща бесна молитвою слезною исцеливый; радуйся, к совершению чудесе сего всю надежду на Бога возложивый.
Радуйся, преподобне Иоанне, Рыльский чудотворче, славо и радосте наша.
Кондак 6
Проповедницы должни есмы быти смирения твоего, преподобне Иоанне, явленнаго пред исцелением беснаго в молитве твоей сицевой: «Боже милосердный, несмь достоин именовати Твое имя моими нечистыми усты!» Сего ради тщимся убо и мы во смирении молитися Господеви и пети Ему: Аллилуиа.
Икос 6
Возсиявшу ти чудесы велиими, множайшую к тебе веру и любовь возимеша людие православнии. Но славе твоей по всей Болгарстей стране прошедшей, востав изшел еси от дуба, славы человеческия бегая. Темже смирения ради твоего ублажаем тя сице:
Радуйся, смирение божественное возлюбивый; радуйся, славу человеческую возненавидевый.
Радуйся, гласа Христова к смирению призывающа, послушавый; радуйся, словеса Писания еже не нам, но имени Божию славу даяти, присно соблюдавый.
Радуйся, высокая достигнувый и ни киих дел благих в себе не видевый; радуйся, древу плодоносну, ветвьми низу клонящуся, подобен бывый.
Радуйся, смирением Давиду, рекшему «аз есмь червь, а не человек», поревновавый; радуйся, купно с пророком Исаиею «о, окаянный аз» вопиявый.
Радуйся, со апостолом грешника себе перваго нарицавый; радуйся, во смирении своем Самому Господу подражавый.
Радуйся, тщеславию доблественне противоставый; радуйся, сие яко прах земный ногами поправый.
Радуйся, преподобне Иоанне, Рыльский чудотворче, славо и радосте наша.
Кондак 7
Хотящу ти страдания большая подъяти пламенныя ради ко Христу любве твоя, столпнику дивному Симеону уподобился еси, на камень возшед, преподобне Иоанне, во дни и нощи аки бесплотен молитву дея, слезами камень омакая и единому токмо Богу беседовати желая. Мы же на подвиг сей взирающе, прославляем всемогущаго Бога в тебе дивнаго и поем Ему: Аллилуиа.
Икос 7
Новаго подвига твоего, блаженне, не стерпев диавол, поемлет с собою легион бесов, иже с камене тя в пропасть глубокую свергоша. Но ты с трудом велиим востав, паки на камень возшел еси творити молитвы твоя и дивящихся воставляеши звати ти:
Радуйся, ко Христу любовь велию стяжавый; радуйся, сего ради тяжце от полков демонских пострадавый.
Радуйся, страдания сия ни во чтоже вменивый; радуйся, Христа паче жизни твоея возлюбивый.
Радуйся, ни чим же от Христа разлученный; радуйся, Им сего ради возлюбленный.
Радуйся, служения ангельскаго сподобивыйся; радуйся, от руки Ангела хлебом питавыйся.
Радуйся, любовию ко Христу вся диавольская искушения победивый; радуйся, тою вся Христа заповеди соблюдый.
Радуйся, любве ради сея токмо славы Божественныя искавый; радуйся, сего ради от Господа прославленный.
Радуйся, преподобне Иоанне, Рыльский чудотворче, славо и радосте наша.
Кондак 8
Странный образ жития твоего, велие смирение и любовь твоя ко Христу приумножиша в тебе благодать, яже ти в крещении Христовых ради страстей и смерти крестныя даровася. Сего ради сотвори тя Господь солнце духовное Православныя Церкве, да просвещаются тобою чада ея ко спасению и да вопиют Богу: Аллилуиа.
Икос 8
Весь был еси сосуд избран Божия благодати, великий Иоанне, на тебе исполнися Крестителя слово, яко не в меру Бог дает Духа. Киими благодатными дарованьми не увенча тя Бог? Киими явленьми благодати не исполнено бысть твое житие? Темже на тя взирающе, приносим ти похвалы сия наша:
Радуйся, дар смирения Христова стяжавый; радуйся, слез и умиления благодать снискавый.
Радуйся, чистотою и целомудрием от Бога украшенный; радуйся, верою чудодейственною озаренный.
Радуйся, не токмо Христу веровавый, но и страдания за Него понесый; радуйся, даром ревности по Бозе увенчанный.
Радуйся, любве к ближним исполненный; радуйся, даром Божественнаго ведения сподобленный.
Радуйся, даром прозорливства просиявый; радуйся, дарование молитвы непрестающия имый.
Радуйся, до конца надежду будущаго блаженства сохранивый; радуйся, блаженство сие еще в жизни сей предвкусивый.
Радуйся, преподобне Иоанне, Рыльский чудотворче, славо и радосте наша.
Кондак 9
Всякое дарование Духа Святаго восприимшу ти, преподобне Иоанне, достиже вещание твое благочестиваго царя Петра, иже видети тя вожделев посла к тебе девять мужей. Ты же алчных их быти духом разумев, малым хлебом напитал еси, иже преславное чудо сие видевше, вопияху Богу: Аллилуиа.
Икос 9
Ветии мира сего не разумеют, како царь Петр, сый во славе своей, к тебе с дары устремися, блаженне, и зело опечалися, не возмогий стремнин ради горных ко святыни твоей приблизитися: но мы, словеса Господа поминающе, ко всем людем реченная, «ищите прежде царствия Божия и правды Его», вопием ти:
Радуйся, яко Царство Небесное на земли достигл еси; радуйся, Царство бо сие, пришедшее в силе, яви ти Господь.
Радуйся, яко Царство Божие в стяжании благодати людем явил еси; радуйся, во плоти бо сый блаженство райское в себе таил еси.
Радуйся, яко бисер многоценный стяжав, суету благ временных показал еси; радуйся, яко правду и мир и радость о Дусе Святе имел еси.
Радуйся, сиянием бо благодати славу царскую затмил еси; радуйся, яко сокровище небесное имый, даров царских не приял еси.
Радуйся, яко зрети друг друга в небесном царствии царю Петру обещал еси; радуйся, яко царя в Писании твоем милосерда и Церкви послушна быти увещал еси.
Радуйся, яко покаянию царя научил еси; радуйся, яко покаяния ради царство вечное ему предрекл еси.
Радуйся, преподобне Иоанне, Рыльский чудотворче, славо и радосте наша.
Кондак 10
Спасти хотя себе до конца от козней вражиих, преподобне Иоанне, пребыл еси в подвизе стояния на камени седмь лет и четыре месяцы. Мнози же поревновавше тебе, близ камене твоего церковь создаша и обитель составиша, начальника тя перваго и пастыря имуще, да возсылается оттуду присно хвалебная Богу песнь: Аллилуиа.
Икос 10
Стена непреоборима бысть ти смирение твое даже до смерти, блаженне Иоанне; разумев бо время отшествия твоего, моление слезное Богу вознесл еси, глаголя: «Отче Вседержителю, ничтоже на земли благо сотворих! Сего ради молю Тя повелети Ангелу благу прийти, да не возбранен ми будет восход от духов лукавствия! Господи, в руце Твои предаю дух мой!» И сия рек, абие дух испустил еси. Мы же, сицевому праведному преставлению дивящеся, тако тя ублажаем:
Радуйся, житием и исходом твоим нас поучаяй; радуйся, горняя мудрствовати, а не земная нас призываяй.
Радуйся, никиимже сластем мирским себе приобщивый; радуйся, блаженную кончину от Бога приемый.
Радуйся, о смерти присно в животе своем помышлявый; радуйся, словеса апостола «по вся дни умираю» исполнивый.
Радуйся, со апостолом Павлом смерти вожделевый; радуйся, разрешитися и со Христом быти присно желание имевый.
Радуйся, слезами и молитвами себе к смерти уготовавый; радуйся, сего ради от смерти не на суд, но в живот пришедый.
Радуйся, вечней радости со Христом по смерти приобщивыйся; радуйся, дерзновение велие пред Богом стяжавый.
Радуйся, преподобне Иоанне, Рыльский чудотворче, славо и радосте наша.
Кондак 11
Пением молебным ублажати тя наставшу времени, благовоние нача от гроба твоего источатися, преподобне Иоанне. Сего ради гроб твой отверзоша и тело твое обретоша нетленно и благоухания исполнено. Оттоле многая чудеса совершахуся от мощей твоих во исцеление к тебе прибегающих и Богу вопиющих: Аллилуиа.
Икос 11
Светоприемную свещу яви тя Господь, преподобне, и храм Духа Святаго, тело же твое тлению непричастно соблюде. Взирающи убо на благодать сию, прославляем тя сице:
Радуйся, нетлением твоим всемогущество Божие благовествуяй; радуйся, безсмертие телес последи общаго воскресения предобразуяй.
Радуйся, нетлением твоим славу Божию в Церкви явивый; радуйся, истину воскресения мертвых утвердивый.
Радуйся, по смерти игумену обители Рыльския во сне явивыйся; радуйся, твоя мощи в Средец град пренести повелевый.
Радуйся, дивная чудеса и зде сотворивый; радуйся, в град Тернов пренесен велия знамения соделавый.
Радуйся, от мощей твоих во градех стольных благодать пролиявый; радуйся, и в пленении быв силами всех ужасивый.
Радуйся, Мануилу царю греческому исцеление даровавый; радуйся, епископу Остригомскому язык связавый и разверзавый.
Радуйся, преподобне Иоанне, Рыльский чудотворче, славо и радосте наша.
Кондак 12
Благодать велию дарова ти Господь за многую любовь, предивный угодниче Божий, преподобне отче наш Иоанне, недуги исцеляти, заблуждшия просвещати и всем просящим быти во спасение. Темже благодаряще Господа, нам тебе даровавшаго, присно зовем ему: Аллилуиа.
Икос 12
Поюще тебе песнь недоумеем, како вся дивная деяния твоя словесы немощными изобразити, преподобне! Зряще же тя велика в угодницех Божиих, дерзаем сице восхвалити тя, зовуще:
Радуйся, в подвизех и трудех предивный; радуйся, прославленным тобою Богом прославленный.
Радуйся, далече вне Церкве Болгарския просиявый; радуйся, и иными Православными Церквами чтимый.
Радуйся, нетленною десницею в Церкви Российстей обитаяй; радуйся, благодатию великих отцев Церкве блистаяй.
Радуйся, подвиги преподобных Антония и Макария явивый; радуйся, деяния светил российских Сергия и Серафима предизобразивый.
Радуйся, от краля унгарскаго прославленный; радуйся, и от турских султанов почтенный.
Радуйся, во обители Рыльстей верными и неверными доселе почитаемый; радуйся, велиих ради чудес твоих от всех прославляемый.
Радуйся, преподобне Иоанне, Рыльский чудотворче, славо и радосте наша.
Кондак 13
О, великий Иоанне, Рыльский чудотворче! Приими сию малую похвалу нашу и молися за ны ко Господу, да ниспослет нам милость Свою и покаянию истинному научит нас, избавит же нас от власти миродержителей тьмы века сего и сохранит в православней вере же и благодатном жительстве под дивным покровом Божия Матере, да спасеннии твоим ходатайством вопием Богу: Аллилуиа.
(Этот кондак читается трижды, затем икос 1 и кондак 1)
Молитва к преподобному Иоанну, Рыльскому чудотворцу и пустынножителю
О, великий и предивный чудотворче, преподобне Иоанне, приими моление наше и не отвратися от нас, к твоему заступлению прибегающих: никогдаже бо отвращался еси от приходивших к тебе с печальми своими во дни земнаго твоего жития; вемы же, коликая знамения милосердия являл еси и по преставлении твоем людем православным! Услыши и нас ныне, велиими скорбьми обдержимых, нашедшими на ны в лукавыя дни сия, егда диавол чрез пагубныя козни своя тщится попрати Церковь Святую, лишити же нас спасения вечнаго и благ временныя жизни! Испроси нам у Господа Иисуса Христа прощения грехов, а наипаче греха непослушания Матери нашей Церкви! Даруй нам сокрушение сердца, во еже со умилением неуклонно приступати ко святому Таинству Покаяния, яко да не во осуждение и погибель будет нам причащение Тела и Крове Христовых, но во здравие и спасение. Отжени от нас дух братоненавидения, даруй нам дух любве и мира к братскому единению всех людей твоих! Соедини всех нас любовию ко Христу и Его Церкве Православней, яко да соблюдающе спасительную волю Его, истинная чада Божия будем! Буди нам путевождь во вся дни наша, яко да присно в благодати Духа Святаго суще в чистоте веру содержим и волю Господню до самыя смерти сотворим! В час же кончины нашея явися нам представити души наша к престолу Божественнаго Судии и рещи Ему: «Се аз и дети моя», яко да твоим заступлением вечных мук избавльшеся, неизреченное блаженство Небеснаго Царствия Христова наследим купно с тобою и всеми святыми во веки веков. Аминь.
ДОМАШНЯЯ МОЛИТВА
Свщмч. Игнатій Богоносецъ († 107 г.)
Св. Игнатій родился въ Сиріи въ послѣдніе годы жизни Спасителя. Его жизнеописаніе повѣствуетъ, что онъ былъ тѣмъ отрокомъ, котораго Господь взялъ на руки и сказалъ: Если не обратитесь и нe будете, какъ дѣти, не войдете въ Царство небесное (Матѳ. 18, 3). Богоносцемъ онъ названъ потому, что, крѣпко любя Господа, онъ какъ бы носилъ Его въ своемъ сердцѣ. Онъ былъ ученикомъ апостола и евангелиста Іоанна Богослова. Святой Игнатій управлялъ Антіохійской Церковью въ теченіе 40 лѣтъ (67-107 гг.). Въ 107-омъ году во время похода противъ армянъ императоръ Траянъ проходилъ черезъ Антіохію. Ему доложили, что святитель Игнатій исповѣдуетъ Христа, учитъ презирать богатство, хранить дѣвство и не приносить жертву римскимъ богамъ. Императоръ вызвалъ святителя и потребовалъ, чтобы онъ прекратилъ свою проповѣдь о Христѣ. Старецъ отказался. Тогда его въ оковахъ послали въ Римъ, гдѣ на потѣху народа, онъ былъ отданъ на растерзаніе звѣрямъ въ Колизеѣ. По пути въ Римъ онъ написалъ семь посланій, которыя сохранились до нашихъ дней. Въ своихъ посланіяхъ святой Игнатій проситъ христіанъ не пытаться спасти его отъ смерти: «Умоляю васъ не оказывайте мнѣ неблаговременной любви. Оставьте меня быть пищею звѣрей, чтобы посредствомъ ихъ достигнуть Бога. Я — пшеница Божія. Пусть измелютъ меня зубы звѣрей, да сдѣлаюсь чистымъ хлѣбомъ Христовымъ». Услышавъ о мужествѣ святителя, Траянъ прекратилъ гоненія на христіанъ. Мощи его были перенесены въ Антіохію, а впослѣдствіи возвращены въ Римъ и положены въ церкви во имя св. свщмч. Климента, еп. Римскаго.
АКАѲИСТЫ
Ака́ѳистъ свято́му священному́ченику и чудотво́рцу Игна́тію Богоно́сцу.
И збра́нный страстоте́рпче и уго́дниче Христо́въ, святи́телю Игна́тіе, похва́льная прино́симъ ти́ пѣ́нія. Ты́ же, предстоя́й со а́нгелы у престо́ла Всевы́шняго, не преста́й моли́тися о на́съ, усе́рдно вопію́щихъ ти́:
Р а́дуйся, богоно́сный Игна́тіе, вели́кій и пресла́вный страстоте́рпче.
А нгеломъ подо́бился еси́, егда́ Госпо́дь, пріе́мъ тя́ на Свои́ пречи́стыя ру́цѣ, поста́ви тя́ посредѣ́ учени́къ Свои́хъ, и возло́жь ру́ку Свою́ на твою́ главу́, рече́ и́мъ: «Аще не обрати́теся и бу́дите я́ко дѣ́ти, не вни́дите въ Ца́рствіе Бо́жіе». Сего́ ра́ди, прекло́ньше колѣ́на, вопіе́мъ ти́:
Р а́дуйся, Бо́гомъ носи́мый; ра́дуйся, я́ко Бо́га вы́ну въ се́рдцѣ свое́мъ имѣ́лъ еси́; ра́дуйся, ра́бе благíй и вѣ́рный; ра́дуйся, му́жу жела́ній; ра́дуйся, я́ко отъ ю́ности Христа́ всѣ́мъ се́рдцемъ возлюби́лъ еси́; ра́дуйся, я́ко всецѣ́ло Ему́ преда́лся еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
В и́дяще благоче́стное житіе́ свята́го Іоа́нна Богосло́ва, учи́теля твоего́, жела́ніемъ возжела́лъ еси́ вку́пѣ съ ни́мъ послужи́ти Го́споду, проповѣ́дуя свято́е Ева́нгеліе лю́дямъ, сѣдя́щимъ во тмѣ́ и сѣ́ни сме́ртнѣй, и науча́я и́хъ пѣ́ти еди́ному и́стинному Бо́гу: А ллилу́ія.
Р азумѣ́въ ду́хомъ, я́ко а́нгели на небеси́ сла́вятъ Бо́га во Свято́й Тро́ицѣ, Творца́ не́ба и земли́, дру́гъ ко дру́гу взыва́юще: Свя́тъ, Свя́тъ, Свя́тъ Госпо́дь Савао́ѳъ, ты́ и въ земно́й Це́ркви уста́вилъ еси́ та́кожде пѣ́ти. Сего́ ра́ди, со умиле́ніемъ взыва́емъ ти́:
Р а́дуйся, Це́ркви Бо́жіей сто́лпе и утвержде́ніе; ра́дуйся, свѣти́льниче Правосла́вія; ра́дуйся, я́ко бы́лъ еси́ епи́скопомъ Це́ркви, идѣ́же пе́рвѣе и́мя христіа́нъ наречеся; ра́дуйся, я́ко отъ апо́столовъ первоверхо́вныхъ рукоположе́ніе прія́ти сподо́бился еси́; ра́дуйся, я́ко удосто́ился еси́ зрѣ́ти святы́я а́нгелы, сла́вящія Бо́га; ра́дуйся, я́ко ны́нѣ и са́мъ со а́нгелы сла́виши Го́спода.
Р а́дуйся, богоно́сный Игна́тіе, вели́кій и пресла́вный страстоте́рпче.
С и́ла Вы́шняго укрѣпи́ тя, святы́й Игна́тіе, егда́ предста́въ Трая́ну, не убоя́лся еси́ преще́нія царе́ва, но му́жественно исповѣ́дывалъ еси́ Христа́ Бо́га бы́ти и́стинна, и нече́стіе язы́ческое посрами́лъ еси́, вѣ́рныя же научи́лъ еси́ Бо́гу воспѣва́ти: А ллилу́ія.
И мѣ́я благода́ть отъ Го́спода просвѣща́ти лю́ди Бо́жія, ты́ наставля́лъ еси́ я́ къ ра́зуму боже́ственному сло́вомъ, па́че же житіе́мъ, о́бразъ бы́въ любо́вію, ду́хомъ, вѣ́рою, чистото́ю и смире́ніемъ. Сего́ ра́ди воспѣва́емъ ти́:
Р а́дуйся, я́ко и́мя Бо́жіе проне́слъ еси́ предъ цари́ и язы́ки; ра́дуйся, я́ко до́брѣ упа́слъ еси́ па́ству твою́; ра́дуйся, смире́ніемъ стяжа́вый высо́кая; ра́дуйся, нището́ю пріобрѣты́й бога́тая; ра́дуйся, апо́стольскихъ преда́ній храни́телю; ра́дуйся, Це́ркви Бо́жіей вѣ́рный стра́же и му́дрый строи́телю.
Р а́дуйся, богоно́сный Игна́тіе, вели́кій и пресла́вный страстоте́рпче.
Б у́рю зло́бы имѣ́я въ се́рдцѣ свое́мъ Трая́нъ, призва́въ тя́, съ гнѣ́вомъ вопроси́: «Ты́ ли еси́ Богоно́сецъ? Почто́ лю́ди моя́ развраща́еши?» Ты́ же отвѣща́лъ еси́: «Азъ е́смь Богоно́сецъ, но лю́ди твоя́ не развраща́ю, а спаса́ю». Кто́ не ублажи́тъ сіе́ твое́ му́жество? Кто́ не воспое́тъ твое́ исповѣ́даніе вѣ́ры? Мы́ же, велича́юще тя́, Бо́гу воспѣва́емъ: А ллилу́ія.
С лы́шавше лю́діе вѣ́рніи твое́ исповѣ́даніе, сла́вляху Бо́га; Трая́нъ же, скрежеща́ зубы́ свои́ми, па́ки вопроси́ тя: «Почто́ зове́шися Богоно́сецъ?» Ты́ же ре́клъ еси́: «Яко Бо́га моего́ въ се́рдцѣ свое́мъ ношу́». Сего́ ра́ди воспѣва́емъ тя́ си́це:
Р а́дуйся, вѣ́рный во́ине Царя́ Небе́снаго; ра́дуйся, цѣвни́це Ду́ха Свята́го; ра́дуйся, побо́рниче вѣ́ры непобѣди́мый; ра́дуйся, па́стырю до́брый; ра́дуйся, моли́твенниче о душа́хъ на́шихъ; ра́дуйся, я́ко Боже́ственнымъ Ду́хомъ просвѣще́нъ, свирѣ́пство мучи́теля па́стырскимъ дерзнове́ніемъ посрами́лъ еси́; ра́дуйся, я́ко наставля́я ста́до Христо́во, мно́гихъ свѣ́томъ богоразу́мія просвѣти́лъ еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
В ся́ кра́сная мíра въ уме́ты вмѣня́я, да Христа́ пріобря́щеши, — «Кто́ ны́ разлучи́тъ отъ любве́ Бо́жія», — вопія́лъ еси́, Игна́тіе. — «Сладка́ мнѣ́ ско́рбь, любе́зны у́зы за Жела́емаго; гоне́нія ми́ сла́ждша па́че оте́чества, болѣ́зни — па́че здра́вія тѣле́снаго». Мы́ же, сла́вную па́мять твою́ чту́ще, пое́мъ Бо́гу: А ллилу́ія.
В и́дя тя́ исповѣ́дника вѣ́ры Христо́вы непобѣди́ма, осуди́ тя безбо́жный Трая́нъ на сме́рть; ты́ же, ра́дуяся, возопи́лъ еси́: «Сладка́ мнѣ́ сме́рть; мнѣ́ е́же жи́ти — Христо́съ, и е́же умре́ти — пріобрѣ́теніе е́сть; къ Нему́ иду́, Того́ люблю́, Того́ получи́ти надѣ́юся». Сего́ ра́ди ублажа́емъ тя́, святы́й Игна́тіе, си́це:
Р а́дуйся, жела́ніе имы́й разрѣши́тися и со Христо́мъ бы́ти; ра́дуйся, же́ртва Бо́гу чиста́; ра́дуйся, подража́телю Христо́выхъ страсте́й; ра́дуйся, я́ко Христо́ви сраспя́лся еси́; ра́дуйся, я́ко кро́вь за Христа́ излія́лъ еси́; ра́дуйся, я́ко кро́вію свое́ю святи́тельскую оде́жду укра́силъ еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
П роповѣ́дникъ терпѣ́нія, богоно́сный Игна́тіе, яви́лся еси́, егда́ съ ра́достію услы́шалъ еси́ осужде́ніе свое́ на растерза́ніе лю́тыми звѣрьми́. Ублажа́я твое́ тве́рдое и неустраши́мое исповѣ́даніе вѣ́ры, и дивя́шеся ве́ліей благода́ти, въ тебѣ́ пребыва́ющей, пое́мъ Бо́гу а́нгельскую пѣ́снь: А ллилу́ія.
В озсія́лъ еси́ я́ко со́лнце, уго́дниче Бо́жій, красото́ю души́ твоея́, [егда́] во́ины возлага́ху на тя́ у́зы, ты́ же, я́ко ри́зу спасе́нія и оде́жду весе́лія прія́лъ еси́ сіе́ но́вое муче́ніе, и на страда́ніе въ Ри́мъ, а́ки на бра́чный пи́ръ ше́ствовалъ еси́. Сего́ ра́ди воспѣва́емъ ти́:
Р а́дуйся, Це́ркви Антіохíйскія сла́во; ра́дуйся, богому́дрыхъ отце́въ красота́ и удобре́ніе; ра́дуйся, во́ине Христо́въ непобѣди́мый; ра́дуйся, я́ко го́рдость Трая́нову низложи́лъ еси́; ра́дуйся, я́ко діа́вола посрами́лъ еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
Х отя́, святи́телю Христо́въ, изы́ти отъ Антіохíи, прилѣ́жно моли́лъ еси́ Го́спода не оста́вити па́ствы твоея́. Пла́каху лю́діе и рыда́ху, зря́ще тя́ на сме́рть ведо́ма; ты́ же, благословля́я и́хъ, воспѣва́лъ еси́ Бо́гу: А ллилу́ія.
Д и́вный во святы́хъ, Бо́гъ утѣ́ши тя́, святы́й Игна́тіе, егда́ на пути́ въ Ри́мъ, ведо́ма тя́ десятію́ во́инами, срѣ́те въ Сми́рнѣ святы́й Полика́рпъ, му́жъ по се́рдцу Бо́жію. Ты́ же, бесѣ́дуя съ ни́мъ, ра́довался еси́ о Бо́зѣ Спа́сѣ. Сего́ ра́ди ублажа́емъ тя́:
Р а́дуйся, я́ко вѣ́ру во Христа́ сохрани́лъ еси́; ра́дуйся, я́ко наде́жду несумнѣ́нну имѣ́лъ еси́; ра́дуйся, я́ко и́мя Христо́во во все́й вселе́нной просла́вилъ еси́; ра́дуйся, я́ко угото́вася тебѣ́ вѣне́цъ пра́вды; ра́дуйся, вѣ́рный служи́телю Бо́жій; ра́дуйся, свѣти́льниче Бо́жій, горя́й и свѣтя́й.
Р а́дуйся, богоно́сный Игна́тіе, вели́кій и пресла́вный страстоте́рпче.
С тра́нно и чу́дно бѣ́ ше́ствіе твое́ въ Ри́мъ на мѣ́сто муче́нія: во́ини я́ко престу́пника ведя́ху тя́, лю́діе же Бо́жіи со епи́скопы и пресви́теры я́ко а́нгела Бо́жія срѣта́ху тя́, и, сла́достно послу́шая слове́съ твои́хъ, воспѣва́ху Бо́гу: А ллилу́ія.
Ж ела́ніе имы́й разрѣши́тися и со Христо́мъ бы́ти, ты́, ше́ствуя въ Ри́мъ на страда́нія, ра́достно воспѣва́лъ еси́: «Пшени́ца Бо́жія е́смь: да бу́ду зубы́ звѣре́й сотре́нъ и чи́стъ хлѣ́бъ Бо́гу явлю́ся». Сего́ ра́ди дивя́щеся терпѣ́нію твоему́ и сла́вяще Бо́жіе о тебѣ́ смотре́ніе, воспѣва́емъ си́це:
Р а́дуйся, о́бразе му́жества и терпѣ́нія; ра́дуйся, непоколеби́мое пра́вило вѣ́ры благочести́выя; ра́дуйся, непобѣди́мый исповѣ́дниче Христо́въ; ра́дуйся, я́ко не убоя́лся еси́ ни огня́, ни меча́, ниже́ зубо́въ ры́кающихъ льво́въ; ра́дуйся, я́ко терпѣ́ніемъ свои́мъ а́нгеловъ Бо́жіихъ возвесели́лъ еси́; ра́дуйся, я́ко му́жествомъ свои́мъ и́мя христіа́нъ просла́вилъ еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
В сего́ себя́ преда́въ Бо́гу, ты́ страши́лся еси́, да не терпя́щіи зрѣ́ти твои́хъ страда́ній воспрепя́тствуютъ тебѣ́ воспрія́ти и́хъ. Сего́ ра́ди писа́ніемъ умоля́лъ еси́: «О, возлю́бленніи! Помози́те ми́ сораспя́стися Христу́, пострада́ти и умре́ти за Него́, да и ца́рствую, и живу́ съ Ни́мъ во вѣ́ки», воспѣва́я Бо́гу: А ллилу́ія.
В ѣтíя многовѣща́нныя не мо́гутъ по достоя́нію воспѣ́ти тя́; сего́ ра́ди и на́мъ удо́бѣе люби́ти молча́ніе, но, побѣжда́еми любо́вію твое́ю, отъ избы́тка се́рдца вопіе́мъ ти́:
Р а́дуйся, я́ко мно́гихъ ко Христу́ приве́лъ еси́; ра́дуйся, я́ко писа́ніями свои́ми пу́ть ко спасе́нію уясни́лъ еси́; ра́дуйся, я́ко жа́ждущія спасе́нія напои́лъ еси́ благоче́стія вода́ми; ра́дуйся, я́ко душе́вными оча́ми ослѣпле́нныхъ свѣ́томъ богоразу́мія просвѣти́лъ еси́; ра́дуйся, я́ко грѣхо́мъ разсла́бленныхъ воздви́глъ еси́ на пу́ть спасе́нія; ра́дуйся, я́ко скорбя́щія и пла́чущія утѣ́шилъ еси́.
Р а́дуйся, богоно́сный Игна́тіе, вели́кій и пресла́вный страстоте́рпче.
С пасти́ хотя́ свою́ ду́шу, ты́, святы́й Игна́тіе, пламенѣ́лъ еси́ серафи́мскою любо́вію къ Бо́гу. — «О, бра́тія!», — моли́лъ ты́ христіа́ны, — «жела́йте мнѣ́ сме́рти, она́ приведе́тъ мя́ ко Христу́; звѣ́ри мнѣ́ ра́достни; о́гнь — роса́ мнѣ́; тщу́ся умре́ти, да живу́ со Христо́мъ». Тѣ́мже всели́лся еси́ въ небе́сныя оби́тели, идѣ́же со а́нгелы Бо́гу воспѣва́еши: А ллилу́ія.
Ц а́рь Небе́сный, Утѣ́шитель Благíй, Ду́хъ и́стины поста́ви тя́ пасти́ Це́рковь Христо́ву, пра́во пра́вити сло́во и́стины, вѣ́рныя лю́ди поуча́ти, проти́вящіяся облича́ти. Сего́ ра́ди зове́мъ ти́:
Р а́дуйся, учи́телю благоче́стія; ра́дуйся, обличи́телю нече́стія; ра́дуйся, ду́шу свою́ положи́вый за о́вцы своя́; ра́дуйся, стяжа́вый вѣне́цъ му́ченичества; ра́дуйся, непреста́нно въ жи́зни моли́выйся за христіа́ны; ра́дуйся, и по сме́рти за ны́ моля́йся.
Р а́дуйся, богоно́сный Игна́тіе, вели́кій и пресла́вный страстоте́рпче.
В оспѣва́я Го́спода и непреста́нно моля́ся Ему́, ты́, святы́й Игна́тіе, поуча́лъ еси́ и ввѣ́ренныя тебѣ́ лю́ди твори́ти та́кожде: «Моли́теся непреста́нно, кро́тость ва́ша да бу́детъ извѣ́стна всѣ́мъ; въ братолю́біи пребыва́йте, да не бу́дутъ въ ва́съ ра́спри; подража́йте за ны́ Распя́тому, вѣ́руйте въ Него́, Онъ е́сть живо́тъ вѣ́чный; вѣ́руяй во́нь, а́ще и умре́тъ — оживе́тъ». Мы́ же, прославля́я Бо́га, дарова́вшаго на́мъ такова́ моли́твенника, вопіе́мъ Ему́: А ллилу́ія.
Я ко со́лнце до́блестно обте́клъ еси́ зе́млю отъ восто́къ до за́падъ, и заше́дъ незаходи́мо отъ земли́ ко Христу́, просвѣща́еши мíръ свои́мъ уче́ніемъ. Сего́ ра́ди взыва́емъ ти́:
Р а́дуйся, уго́дниче Христо́въ; ра́дуйся, му́чениче и па́стырю; ра́дуйся, ско́рый въ бѣда́хъ помо́щниче; ра́дуйся, гони́мыхъ за пра́вду защи́тниче; ра́дуйся, немощны́хъ врачу́; ра́дуйся, покро́въ и заступле́ніе притека́ющихъ съ вѣ́рою къ тебѣ́.
Р а́дуйся, богоно́сный Игна́тіе, вели́кій и пресла́вный страстоте́рпче.
Б лагода́ть ве́лію и бога́тую ми́лость прія́лъ еси́ отъ Христа́ Бо́га на́шего моли́тися за всѣ́хъ, съ вѣ́рою призыва́ющихъ тя́. Тѣ́мже мо́лимъ тя́: помози́ на́мъ предста́тельствомъ свои́мъ у Го́спода сохрани́ти въ се́рдцѣ свое́мъ вѣ́ру несумнѣ́нну, упова́ніе непрело́жно, любо́вь къ Бо́гу и бли́жнему нелицемѣ́рну, по́двигомъ до́брымъ подвиза́тися, воспѣва́я Бо́гу: А ллилу́ія.
П ою́ще по́двиги твоя́, почита́емъ страда́нія твоя́, восхваля́емъ му́жество твое́, ублажа́емъ святу́ю кончи́ну твою́, и прилѣ́жно мо́лимъ тя́, услы́ши ны́, взыва́ющія ти́:
Р а́дуйся, тече́ніе жи́зни сла́вно сконча́вый; ра́дуйся, кро́вію свое́ю и́стину Христо́ва уче́нія запечатлѣ́вый; ра́дуйся, получи́вый отъ Христа́ вѣне́цъ пра́вды, угото́ванный всѣ́мъ, возлюби́вшимъ явле́ніе Его́; ра́дуйся, во свѣ́тлостехъ святы́хъ всели́выйся; ра́дуйся, я́ко со арха́нгелы и а́нгелы ликовству́еши; ра́дуйся, я́ко лицезрѣ́ніемъ Бо́жіимъ наслажда́ешися.
Р а́дуйся, богоно́сный Игна́тіе, вели́кій и пресла́вный страстоте́рпче.
О , многострада́льный и преди́вный му́чениче, богоно́сный Игна́тіе! Пріими́ отъ на́съ недосто́йныхъ сіе́ ма́лое хвале́бное пѣ́ніе и умоли́ Бо́га, да сохрани́тъ ны́ и защити́тъ Свое́ю благода́тію отъ вся́каго зла́ въ се́й жи́зни, и во вре́мя кончи́ны на́шей не оста́витъ на́съ, и по кончи́нѣ сподо́битъ Ца́рствіе небе́сное наслѣ́довати и вѣ́чно воспѣва́ти Бо́гу: А ллилу́ія, аллилу́ія, аллилу́ія.
[ Се́й конда́къ глаго́ли три́жды. Та́же и́косъ 1-й: А нгеломъ подо́бился. И конда́къ 1-й: И збра́нный страстоте́рпче. ]
О , вели́кій святи́телю, богоно́сный Игна́тіе! Къ тебѣ́ припа́даемъ и мо́лимъ тя́: при́зри на ны́, грѣ́шныя, прибѣга́ющія къ твоему́ заступле́нію, и умоли́ Го́спода, да прости́тъ на́мъ вся́ согрѣше́нія на́ша. Ты́ му́ченически ду́шу твою́ за вѣ́ру положи́лъ еси́, да́руй и на́мъ му́жество во все́мъ подража́ти тебѣ́. Ничто́ въ жи́зни не возмогло́ отлучи́ти тя́ отъ любви́ ко Го́споду: ни ле́стныя обѣща́нія, ни преще́нія, ни угро́зы, ниже́ са́мыя му́ки. Ты́ съ ра́достію предста́лъ предъ звѣрьми́ на сме́рть лю́тую, и я́ко а́нгелъ возлетѣ́лъ еси́ во оби́тели Отца́ на́шего Небе́снаго. И моли́тва твоя́ мно́го мо́жетъ предъ Го́сподемъ. Бу́ди же, святы́й угодниче, предста́телемъ у Госпо́да: испроси́ благоде́нственное и ми́рное житіе́, здра́віе и спасе́ніе, и во все́мъ благопоспѣше́ніе, на враги́ же побѣ́ду и одолѣ́ніе Благочести́вѣйшему Госуда́рю на́шему Импера́тору [и́мярекъ] , и всему́ Ца́рствующему До́му, да осѣни́тъ Онъ, Милосе́рдый, Свое́ю благода́тію, и да охрани́тъ Его́ на всѣ́хъ путя́хъ Его́ святы́ми Свои́ми а́нгелами. Помога́й и всѣ́мъ правосла́внымъ христіа́номъ святы́ми твои́ми моли́твами ко Всемогу́щему Бо́гу, да изба́витъ ны́ отъ гла́да, тру́са, гра́да, бездо́ждія и смертоно́сныхъ болѣ́зней, и да да́руетъ на́мъ здра́віе и спасе́ніе. Бу́ди же на́мъ помо́щникъ ско́рый во вся́кой ско́рби, наипа́че же въ ча́съ кончи́ны на́шея яви́ся на́мъ свѣ́тлымъ защи́тникомъ и хода́таемъ, и умоли́ Го́спода сподо́битися всѣ́мъ на́мъ, тебѣ́ ны́нѣ те́плѣ моля́щимся, получи́ти по христіа́нской кончи́нѣ небе́сное Ца́рствіе, идѣ́же всѣ́ святы́е вку́пѣ съ тобо́ю вѣ́чно сла́вятъ Отца́ и Сы́на и Свята́го Ду́ха. Ами́нь.
Тропа́рь, гла́съ 4:
И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, и видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Игна́тіе, моли́ Христа́ Бо́га спасти́ся душа́мъ на́шимъ.
Сла́ва, и ны́нѣ, богоро́диченъ, гла́съ то́йже:
Е же отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.
Конда́къ, гла́съ 3. Подо́бенъ: Д ѣ́ва дне́сь.
С вѣ́тлыхъ по́двигъ твои́хъ свѣтоно́сный де́нь предпроповѣ́дуетъ всѣ́мъ въ верте́пѣ Рожде́ннаго: Сего́ бо жажда́я отъ любве́ наслади́тися, потща́лся еси́ отъ звѣре́й снѣде́нъ бы́ти, сего́ ра́ди и Богоно́сецъ наре́клся еси́, Игна́тіе всему́дре.
В елича́емъ тя́, священному́чениче Игна́тіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.
Источникъ: Ака́ѳистъ свято́му священному́ченику и чудотво́рцу Игна́тію Богоно́сцу, на пра́зднество, соверша́емое 20-го Деке́мврія. — Изда́ніе Каза́нской общи́ны при с. Шамардинѣ́, Калу́жской губе́рніи. — М.: Въ Сѵнода́льной Тѵпогра́фіи, 1893. — 36 с.
Акафист преподобному Иоанну, Рыльскому чудотворцу: текст, для чего читают
Кондак 1
Избранный чудотворче и предивный угодниче Христов, преподобне отче наш Иоанне, от юности к Богу прилепився и мирский мятеж оставль, в гору Рыльскую вселился еси, идже постом, молитвою и плачем многим подвизався и волнение суеты преплыв, небеснаго Царствия сподобился еси. Сего ради воспеваем тя, яко тепла о нас к Богу молитвенника, и молим ти ся, благодати тезоименне, даждь нам благодать, во еже звати ти:
Радуйся, преподобне отче Иоанне, Болгарския земли солнце пресветлое.
Икос 1
Ангели удивишася богоугодному житию твоему, преподобне отче Иоанне, и яко служебнии дуси, в служение к тебе посылаеми, хотящему наследовати спасение, радостными гласы привещаху тебе таковая:
Радуйся, Спасителя твоего заповеди соблюдый;
радуйся, ничтоже на земли паче Его возлюбивый.
Радуйся, яко Божественнаго гласа, во след Христа зовуща, послушал еси;
радуйся, яко землю обетования достигл еси.
Радуйся, на горе Рыльстей мирскаго потопления избывый;
радуйся, в благодарственную жертву самаго себе Богу принесый.
Радуйся, на лествицу добродетелей возшедый;
радуйся, Бога на версе ея узревый.
Радуйся, не в гадании Христа видевый;
радуйся, Агнцу за ны от века закланному послуживый.
Радуйся, древа жизни сопричастниче;
радуйся, Царствия небеснаго наследниче.
Радуйся, преподобне отче Иоанне, Болгарския земли солнце пресветлое.
Кондак 2
Видя жития сего всяческую суету, преподобне отче Иоанне, вся имения твоя нищим раздал еси и узким путем иночества во след Христа шествуя, широту небеснаго Царствия достигл еси, непрестанно поя Богу: Аллилуия.
Икос 2
Разум недоразуменный, в Небеснем Иерусалиме сокровенный, постигнути желая, преподобне отче Иоанне, во вся оружия Божия облеклся еси и умных рук на высоту воздянием мысленнаго Амалика побеждал еси. Мы же, победителя тя зряще, в похвалу взываем ти таковая:
Радуйся, ангелов подражателю;
радуйся, праотцем святым подражателю.
Радуйся, новый Ное, покаяния проповедниче;
радуйся, древняго Авраама веры наследниче.
Радуйся, Исаакова послушания сопричастниче;
радуйся, Иаковля богозрения сообщниче.
Радуйся, над страстьми и похотьми, яко Иосиф над Египтом, воцаривыйся;
радуйся, Моисейски, постом и молитвою к Богу собеседник явивыйся.
Радуйся, Самуилова богозвания услышавый;
радуйся, Давидову кротость восприемый.
Радуйся, Илиину ревность по Господе Бозе наследовавый;
радуйся, Иовле терпние в злостраданиих стяжавый.
Радуйся, преподобне отче Иоанне, Болгарския земли солнце пресветлое.
Кондак 3
Сила Вышняго подвизаше тя, преподобне отче Иоанне, на большия подвиги и душа твоя, якоже елень на источники водныя, возжада к Богу крепкому, живому. Сего ради из обители изшед, идже образ ангельский восприял еси, в гору Рыльскую вселился еси, Богу присно воспевая: Аллилуия.
Икос 3
Имея в пустынном житии твоем, преподобне отче Иоанне, едину одежду кожаную во одеяние, в пищу же былие травное, еже слезами горькими вкушая, с пророком Богу вопиял еси, — скотен бых у Тебе, — нас воставляеши вопити тебе:
Радуйся, в пустынном житии Предтечи Иоанну подражавый;
радуйся, житием сим небесныя дары стяжавый.
Радуйся, благое иго Христово на себе вземый;
радуйся, легкое бремя Его на раме понесый.
Радуйся, кротости Владыки твоего научивыйся;
радуйся, в смирении Его упокоивыйся.
Радуйся, яко на тебе исполнися благоволение небеснаго Отца;
радуйся, яко в тя вселися благодать Пресвятаго Духа.
Радуйся, яко тебе открышася безвестная и тайная;
радуйся, яко тебе воздадеся радость спасения.
Радуйся, яко за скорбное житие сподоби тя Бог вечнаго веселия;
радуйся, яко срадуются сему твои кости смиренныя.
Радуйся, преподобне отче Иоанне, Болгарския земли солнце пресветлое.
Кондак 4
Бурю многую искушений воздвиже диавол, устрашити и отгнати хотя преподобнаго Иоанна от места спасения. Но доблий непобдимь пребываше, непрестанно к Богу взывая: Господи, посли свет Твой и истину Твою, да наставита мя в гору святую Твою и селения Твоя, идже со всеми святыми воспою: Аллилуия.
Икос 4
Слышаша пастырие тя с безсловесными овцами бесдующа, преподобне отче Иоанне, со тщанием притекоша к тебе, яко к пастырю словесных овец, и удивльшеся житию твоему, воспеваху в похвалу твою таковая:
Радуйся, нищих духом ко Христу водителю;
радуйся, пути в Царство небесное указателю.
Радуйся, плачущих о Господе утешителю;
радуйся, кротких земли сообладателю.
Радуйся, алчущих Царства небеснаго насытителю;
радуйся, жаждущих правды Божия напоителю.
Радуйся, милостивым мзды Божия щедроподателю;
радуйся, чистотою сердца изрядный богозрителю.
Радуйся, миротворцев богосыновный наставниче;
радуйся, изгнанных правды ради верный спутниче.
Радуйся, за Христа от злых человек поношение претерпвый;
радуйся, трудов твоих многую мзду на небесх восприемый.
Радуйся, преподобне отче Иоанне, Болгарския земли солнце пресветлое.
Кондак 5
Боготечней звезде уподобився, преподобне отче Иоанне, по неколиких летех подвига твоего от колибы хврастныя и дупла древяна в пещеру темну востекл еси, и на камени нозе твои поставив, Камени Краеугольному, Христу, непрестанно пел еси: Аллилуия.
Икос 5
Видев южик твой, Лука отрок, оставльша тя мир и в пустыню всельшася, взыска тя яко сокровище некое, преподобне отче Иоанне, и благословения сподобився пребывати в подвизех твоих, возрадовася зело и пояше в похвалу твою таковая:
Радуйся, Началопастыря Христа учениче;
радуйся, добродетелей Его подвижниче.
Радуйся, древо, при исходищих вод насажденное;
радуйся, плоды Святаго Духа приносящее.
Радуйся, Божественныя любве наставниче;
радуйся, радости о Дусе Святе вместилище.
Радуйся, мира премирнаго селение;
радуйся, адаманте изрядный долготерпния.
Радуйся, благости и милосердия пучино безмерная;
радуйся, веры правило несумненныя.
Радуйся, кротости образ и начертание;
радуйся, учителю воздержания.
Радуйся, преподобне отче Иоанне, Болгарския земли солнце пресветлое.
Кондак 6
Проповедницы миру добродетелей твоих явишася пастырие, преподобне отче Иоанне, иже тя видша в пустыни злаком травным чудесно их напитавша, и Питателю всех, Богу, поюща: Аллилуия.
Икос 6
Возсиял еси в пустыни Рыльстй, яко велие светило светом добродетелей твоих, преподобне отче Иоанне, сего ради стекахуся к тебе хотящии шествовати путем твоим, иже и в похвалу твою вопияху таковая:
Радуйся, яко во вся оружия Божия облеклся еси;
радуйся, яко кознем лукаваго противустал еси.
Радуйся, яко чресла истиною препоясал еси;
радуйся, яко в Божественную правду одялся еси.
Радуйся, яко уготовался еси к мира благовствованию;
радуйся, яко щит имел еси, веру непобедимую.
Радуйся, яко вся стрелы лукаваго разжженныя угасил еси;
радуйся, яко шлем спасения восприял еси.
Радуйся, глагол Божий присно во устех носивый;
радуйся, глаголом сим, якоже мечем, врага победивый.
Радуйся, яко всегда в молитвах пребывал еси;
радуйся, яко постом душу твою питал еси.
Радуйся, преподобне отче Иоанне, Болгарския земли солнце пресветлое.
Кондак 7
Хотящу брату твоему, врага человеча наущением, взяти сына своего от сожития твоего, преподобне отче Иоанне, змий, навет лукаваго обличая, усекну и умертви отрока. Добре бо бе ему от тела разрешитися и чисту ко Господу преити, да поет с тобою и всеми святыми: Аллилуия.
Икос 7
Новую обитель воздвигл еси, преподобне отче Иоанне, в нейже игумен был еси богособранному стаду словесных овец, иже слышаху гласа твоего и идяху добродетельным путем твоим, в похвалу твою зовуще сицевая:
Радуйся, живый в помощи Вышняго;
радуйся, водворивыйся в крове Бога небеснаго.
Радуйся, истинный рабе Его и служителю;
радуйся, лжи нелицемерный обличителю.
Радуйся, веры правыя насадителю;
радуйся, суеверия искоренителю.
Радуйся, целомудрия наставниче;
радуйся, послушания учителю.
Радуйся, злобы диаволи разрушителю;
радуйся, мира Божественнаго сеятелю.
Радуйся, подвизающихся о Господе укрепителю;
радуйся, во грехи падающих исправителю.
Радуйся, преподобне отче Иоанне, Болгарския земли солнце пресветлое.
Кондак 8
Странное чудо видеша христоименитии людие, человека на многа лета беснованием одержимаго к преподобному Иоанну приведшии, здрава того сотвори, благодарственно воспвающа Богу: Аллилуия.
Икос 8
Всем, приходящим к тебе, вся был еси, преподобне отче Иоанне, сего ради славляху тя окрестнии людие и в похвалу твою воспеваху таковая:
Радуйся, постом и молитвою диавола посрамивый;
радуйся, духов лукавствия от человек изгнавый.
Радуйся, себе от козней вражиих крестом оградивый;
радуйся, людей окрестных от прелести лукаваго молитвою избавивый.
Радуйся, соль земли, водою крещения раждаемая;
радуйся, силою Божественною притекающих осоляющая.
Радуйся, граде Христов, верху горы поставленный;
радуйся, светом небесным осияваемый.
Радуйся, светильниче, в мир сем добродетельми светящий;
радуйся, к Богу и ближним любовию горящий.
Радуйся, обуреваемых ересьми тихое пристанище;
радуйся, Православия непоколебимый столпе.
Радуйся, преподобне отче Иоанне, Болгарския земли солнце пресветлое.
Кондак 9
Всякое естество человческое удивися, зря тя во плоти, яко безплотна, живуща, преподобне отче Иоанне. Темже благочестивый царь Петр слышав о тебе, восхоте благословения твоего, но не возмогоша к тебе приблизитися, видением огня и дыма сподобил еси его, иже и благодарственно воспе Богу: Аллилуия.
Икос 9
Ветии многоглаголивии не могут по достоянию восхвалити тя, преподобне отче Иоанне, но благочестивый царь Петр, удивився твоей святыни и отеческое твое получив наказание посланием твоим, благодарственно тебе воспеваше:
Радуйся, Царя царей служителю;
радуйся, закона Его исполнителю.
Радуйся, Христови сраспныйся;
радуйся, славы Его сподобивыйся.
Радуйся, сосуде Божественныхъ благодатей;
радуйся вместилище всех добродетелей.
Радуйся, яко тобою Бог прославляется;
радуйся, яко тобою демони посрамляются.
Радуйся, печальных благодатное утешение;
радуйся, скорбящих нечаянное радование.
Радуйся, монашествующих покрове и утверждение;
радуйся, всех верных упование и защищение.
Радуйся, преподобне отче Иоанне, Болгарския земли солнце пресветлое.
Кондак 10
Спастися хотя суетныя славы человеческия, Божественныя же сподобитися, преподобне отче Иоанне, игумена другаго вместо себе братии поставил еси и завет добрый им завещал еси, и на молитвенныя подвиги в безмолвии паки удалился еси, един Единому поя Богу: Аллилуия.
Икос 10
Стену и утверждение имуще тя вси православнии людие земли Болгарския, преподобне отче Иоанне, славляху всюду подвиги твоя, в похвалу твою вопиюще таковая:
Радуйся, яко терпя, потерпел еси временныя скорби;
радуйся, яко внят и услыша Господь твоя молитвы.
Радуйся, яко возведе тя от рова страстей и греховныя тины;
радуйся, яко постави нозе твои на твердем камени.
Радуйся, яко вложи Господь во уста твоя песнь нову;
радуйся, яко ею воспевал еси Бога нашего выну.
Радуйся, яко мнози узреша чудеса твоя и убояшася;
радуйся, яко боящиися Господа тобою спасошася и непостыдешася.
Радуйся, яко правду Господню не скрыл еси в сердцы твоем;
радуйся, яко истину и спасение возвестил еси людем.
Радуйся, яко возрадовашася тобою Господа ищущии;
радуйся, яко возвеличиша Его спасение любящии.
Радуйся, преподобне отче Иоанне, Болгарския земли солнце пресветлое.
Кондак 11
Пение всякое побеждается, спростретися тщащееся ко множеству многихъ слез твоих и подвигов, преподобне отче Иоанне; старостию же преклонен и недугом отягчен, молитвенно к Богу взывал еси: Боже Вседержителю, приими мя грешнаго раба Твоего и сопричти мя лику избранных Твоих, да с ними пою Ти: Аллилуия.
Икос 11
Светоприемную твою душу мирно предал еси Господеви, Егоже от юности возлюбил еси. Богособранная же чада твоя, безгласна тя зряще, со слезами вопияху:
Радуйся, светило Православия, в пустыни Рыльстей возсиявшее;
радуйся, к небесному Свету, Христу Богу, прешедшее.
Радуйся, наставниче наш, иже к совершенству нас призываеши;
радуйся, пастырю добрый, иже к блаженному концу нас путеводиши.
Радуйся, яко и по преставлении жив от веры пребываеши;
радуйся, по исходе твоем духом нас не оставляеши.
Радуйся, новый наш пред Богом предстателю;
радуйся, о душах наших теплейший ходатаю.
Радуйся, святе, ликом ангельским сопричтенный;
радуйся, блаженне, в покой небесный достигнувый.
Радуйся, рабе благий, в радость Господа твоего вшедый;
радуйся, трудов твоих достойную мзду восприемый.
Радуйся, преподобне отче Иоанне, Болгарския земли солнце пресветлое.
Кондак 12
Благодать дана ти бысть от Бога чудеса творити дивная и по преставлении твоем, преподобне отче Иоанне: Мануилу бо царю Греческому мышцу исцелил еси, Георгия Скилицу от тяжкаго недуга избавил еси, епископу Унгарскому язык молчанием связав, паки разрешил еси. Иже вси, от бед и болезней избавльшеся, воспеваху Богу: Аллилуия.
Икос 12
Поюще твоя подвиги и чудеса, восхваляем тя, преподобне отче Иоанне, и чтем святую память твою, вопиюще в похвалу твою таковая:
Радуйся, чудес Христовых источниче;
радуйся, умиления сердечнаго сокровище.
Радуйся, тебе бо ангели служаху;
радуйся, яко не имущу питания, хлеб тебе приношаху.
Радуйся, Православия утверждение;
радуйся, ересей посрамление.
Радуйся, болящих исцелителю;
радуйся, скорбящих утешителю.
Радуйся, верных прославление;
радуйся, неверных обличение.
Радуйся, плачущих о гресех ходатаю к Богу предивный;
радуйся, кающихся в беззакониих отче чадолюбивый.
Радуйся, преподобне отче Иоанне, Болгарския земли солнце пресветлое.
Кондак 13
О, преподобне и богоносне отче наш Иоанне, утшение скорбящих и врачу недужных! Приими ныне малое сие приношение наше, и будущия муки всем нам избавитися Господа умоли, да с тобою вопием Ему: Аллилуия.
Сей Кондак глаголется трижды. Таже Икос 1-й: Ангели удивишася. И Кондак 1-й: Избранный чудотворче.
Молитва ко преподобному и богоносному отцу нашему Иоанну, пустынножителю Рыльскому, чудотворцу
О, преподобне и богоносне отче наш Иоанне, зрителю неизреченныя славы в небеснм Царствии и помощниче благодатный всем, к тебе притекающим! Не остави места сего, на немже труды и подвиги о Христе подъял еси и землю слезами твоими оросил еси. Да пребудет обитель твоя, в нейже благоволи Бог святым твоим мощем почивати, незыблема от ухищрений врагов видимых и невидимых. Укрепи в доброделании чада твоя, ихже во обитель твою собрал еси, яко да познают звание свое и последуют стопам твоим. Страну нашу в мир соблюди. Православным людем во бранех на сопротивныя споборствуй. Посети с высоты небесныя всех, верно к тебе притекающих и просящих твоего крепкаго заступления: в мори плавающих управи, житейскаго моря волнение утиши, церковныя раздоры укроти, мир всему миру у Господа испроси, болящих уврачуй спасительным посещением, скорбных утеши благодатию, всем буди вся, якоже был еси в земном житии твоем. Сотвори о нас к Богу молитву, дана бо ти есть благодать молитися за ны, яко да сподобимся твоим ходатайством улучити вечное блаженство купно с тобою и всеми святыми во Христе Иисусе, Господе нашем, Емуже подобает всякая слава, честь и поклонение со Отцем и Святым Духом во веки веков. Аминь.
Тропарь, глас 1:
Покаяния основание, прописание умиления, образ утешения, духовнаго совершения равноангельное житие твое бысть, преподобне. В молитвах убо и в пощениих и в слезах пребывавый, отче Иоанне, моли Христа Бога о душах наших.
Кондак, глас 2:
в молитвах бодренно не усыпая и в пениих непрестанных ангелом подобяся, в гроб вшел еси, тленную жизнь оставив, и к небеси прешел еси на нетление, Иоанне отче, от смерти бо к животу вечному тя пресели Христос Бог, яко Своего угодника.
Величание:
Ублажаем тя, преподобне отче Иоанне, и чтем святую память твою, наставниче монахов и собеседниче ангелов.
Творение архимандрита Варсонофия Валаамца (Толстухина) (Россия), иже во обители Рыльстй в лето 1926-е странствовавшаго и в Рабат (Марокко, Африка) в лето 1952-е 14/27 Февруария преставльшагося.
Источник: Богослужебная последования на все лето преподобному и богоносному отцу нашему Иоанну Рыльскому, с приложением. † Левкийский епископъ Парений. — София: Синодально издательство, 1955. — Л. 159-168.
Акафисты — что это такое. Как правильно акафист читать Господу, Богородице и святым.
ЧТО ТАКОЕ АКАФИСТ
Акафист — это хвалебная песнь или торжественный гимн, который написан в честь Христа, Божией Матери или святому. Его читают обращаясь к конкретному святому, чтобы он помог при разрешении каких-то дел или просто для утешения. 
«Неседальное пение» — так переводится акафист с древнегреческого языка. И этот перевод означает, что читать или слушать акафист нужно стоя, сидеть нельзя, исключение составляют лишь больные люди.
Акафист принято читать, стоя лицом к иконе того святого или события, во имя и честь которого исполняется славление. При отсутствии иконы можно прийти в храм и здесь прочитать акафист. Если и этой возможности нет, то вполне допустимо читать акафисты, стоя лицом к востоку.
Господь Иисус Христос так учил нас молиться:
«Ты же, когда молишься, войди в комнату твою и, затворив дверь твою, помолись Отцу твоему, Который втайне; и Отец твой, видящий тайное, воздаст тебе явно»(Мф.6,6).
Святые отцы так объясняют эти слова — неважно, где человек молится, главное, чтобы молитва была в сердце.
Акафист состоит из разных частей — кондаков и икосов.
Кондак представляет собой небольшую песнь, кратко описывющую какую-либо историю или поступок, который совершил святой.
Икос — это тоже восхваляющая песнь, которая более расширенно раскрывает то событие, которое воспето в предыдущем кондаке.
Например, в пятом икосе будет идти речь о том же событии, что и в пятом кондаке, но более подробно.
Также вместе с чтением акафиста читают тропари, которые похожи на кондаки — это тоже небольшая восхваляющая песнь, посвященная святым или в честь какого-то события, праздника.
ПОРЯДОК ЧТЕНИЯ АКАФИСТА
Порядок чтения акафистов такой же, как обычных молитв- обычно сначала читают начальные молитвы (например, как в утренних молитвах по «Отче наш»), а потом и сам акафист. Можно совместить утреннее или вечернее правило с чтением акафиста. В этом случае второй раз прочитывать начальные молитвы не нужно, а читать акафист можно после молитв до конечной молитвы «Достойно есть».
Но и чтение только одного акафиста не будет считаться ошибкой, самое главное в чтении акафиста, также, как и в чтении любых других молитв, это искренняя вера в Бога (подробнее в статьях как нужно молиться и учитесь молиться) и глубокое почитание святого, которому читается акафист.
Полное правило чтения акафистов:
- Моли́твами святых оте́ц на́ших, Го́споди Иису́се Христе́, Бо́же наш, поми́луй нас. Ами́нь.
- Сла́ва Тебе́, Бо́же наш, сла́ва Тебе́
- Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
(От Пасхи до Вознесения вместо этой молитвы читаем: «Христо́с воскре́се из ме́ртвых, сме́ртию смерть попра́в, и су́щим во гробе́х живо́т даровав» (трижды). От Вознесения до Троицы ее не читаем вообще. - Святы́й Бо́же, Святы́й Кре́пкий, Святый Безсме́ртный, поми́луй нас. (Трижды, с крестным знамением и поясным поклоном.)
- Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
- Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святый, посети́ и исцели́ не́мощи на́ша, и́мене Твоего́ ра́ди.
- Го́споди, поми́луй. (Трижды).
- Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
- Отче наш.
- Прииди́те, поклони́мся Царе́ви на́шему Бо́гу. (Поклон)
- Прииди́те, поклони́мся и припаде́м Христу́, Царе́ви на́шему Бо́гу. (Поклон)
- Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)
- Псалом 50.
- Символ веры
Читать акафист
После акафиста:
- Достойно есть
(От Пасхи до Вознесения вместо этой молитвы читается припев и ирмос 9-й песни Пасхального канона:
А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба и ме́ртвыя воздви́гнувый; лю́дие, весели́теся! Свети́ся, свети́ся, но́вый Иерусали́ме, сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́) - Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
- Го́споди, поми́луй. (Трижды).
- Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (или святым, которым читался акафист, если Господу или Богородице, то ничего не произносим) и всех святых, поми́луй и спаси́ мя, гре́шнаго, я́ко Благ и Человеколю́бец. Аминь.
(Если Кресту — силою Честнаго и Животворящего Креста, если Ангелам — Честных Небесных Сил Бесплотных)
Загрузка...